| "ԻՄ ՔԱՂԱՔԸ" տեղեկատվական-խորհրդատվական կենտրոն 2010 թվականի փետրվար ամսին Քաղաքացիական զարգացման և համագործակցության հիմնադրամը (ՔԶՀՀ) և Քաունթերփարտ Ինթերնեշնլ կազմակերպության հայաստանյան ներկայացչությունը նախաձեռնել և Նորվեգական կառավարության ֆինանսական աջակցությամբ իրականացնում են «Ես քաղաքացի» ծրագիրը, որը նպատակ ունի բարձրացնել բնակչության մասնակցությունը Երևանի քաղաքապետարանի որոշումների ընդունման գործընթացում` քաղաքացիներին քաջալերման և խրախուսման համապատասխան ինստիտուցիոնալ մեխանիզմների ստեղծման և ներմուծման միջոցով: Ծրագրի շրջանակներում ՔԶՀՀ-ի կողմից ստեղծվել է «Իմ քաղաքը» տեղեկատվական-խորհրդատվական կենտրոնը, որի նպատակն է իրազեկել քաղաքացիներին իրենց իրավունքների և պարտականությունների մասին, ինչպես նաև նպաստել քաղաքացի-համայնք, քաղաքացի-պետություն երկխոսության ձևավորմանը: Այդ նպատակով Կենտրոնը տրամադրում է անվճար աջակցություն Երևանի բնակչությանը քաղաքի, իրենց համայնքի կամ համատիրության, ինչպես նաև հանրային ծառայությունների հետ առնչվող խնդիրների վերաբերյալ: Կենտրոնի փորձառու իրավաբանները հեռախոսային և առերես խորհրդատվության միջոցով աջակցում են Կենտրոնի դիմումատուներին գտնել իրենց խնդրի ճիշտ հասցեատիրոջը, պատրաստել անհրաժեշտ դիմումներ և նամակներ, ինչպես նաև հետևում են այդ դիմումների և նամակների ներկայացումից հետո տեղի ունեցող գործընթացների և պատասխանների օրենքներին համապատասխանությանը: Բացելով իր դռները 2010թ-ի մարտին` Կենտրոնը արդեն իսկ արձագանքել է ավելի քան 480 դիմումների, որոնցից 73% ստացել են օրենքով սահմանված իրենց լուծումները: Կենտրոնի գործունեության լավագույն գնահատականն է հանդիսանում աճող դիմումների քանակը, որը ամսեկան ավելանում է 15-20 նոր դիմումատուներով: Համալրված լինելով պրոֆեսիոնալ իրավաբան-խորհրդատուներով և համապատասխան տեխնիկայով, առաջնորդվելով արդարության, անկողմնակալության և թափանցիկության սկզբունքներով` Կենտրոնը բաց է յուրաքանչյուր անձի համար, ով խորհրդատվության կամ աջակցության կարիք ունի Երևան քաղաքին առնչվող իր խնդիրների լուծման համար: Կենտրոնը տեղակայված է Պռոշյան 11/5 հասցեում և բաց է երկուշաբթիից ուրբաթ ժամը 09:00-ից մինչև 18:00: Կենտրոնում գործում է թեժ գիծ` 080 001 008 անվճար հեռախոսահամարով: |
